النجاح والفشل

النجاح هو انك توصل للشئ اللى انت عاوز توصلله اياً كان .. مهم او تافه .. وايا كانت الطريقه .. سهله او صعبه .. المهم انك توصل لهدفك , والاهم انك تبدأ .

 فكر .. اتحرك .. اهتم .. خطط .. توكل .. وابدأ

 

البدايه بتحدد كل شئ .. وكل ما كانت بدايتك قويه كل ما كنت اقرب للنجاح .

كتير من الناس مش عاجبها الوضع الحالى في مصر ولا عاجبهم حالهم ولا حال غيرهم .._ مع ان في بصيص من الامل _  ونفسهم يغيروا الواقع .. بس الواقع مبيتغيرش .. المستقبل هو اللى بيتغير . اه ... المستقبل اللى لسه محصلش هو اللى بيتغير !!ابدأ..... بنفسك . 

 

الموضوع سهل وبسيط 1+1=2   ,, او ممكن = 3  ,, او ممكن = صفر .

 في العادى .. لو حددت انت عاوز ايه بالظبط واهتميت واصريت انك توصل للشئ اللى انتا عاوزه والله هتوصله . كل حاجه متوقفه على ارادتك انت .. انتا لو عاوز تنجح هتنجح ولو مش عاوز هتبقى مكانك او هترجع للوراء وناس تانيه هتاخد مكانك ..

 يعنى طول ما انتا محدد هدفك وماشى في طريقك ومركز كل تفكيرك ومجهودك على الشئ اللى انت عاوز توصل له .. هتوصل له .

 

 

الحظ  .. هى الدنيا ايه غير شوية حظ  ..يااااه !!.

.الدنيا زى البحر وانت الصياد ..ممكن ترمى الشبكه تطلعلك سمكه واحده .. وممكن ترميها تطلعلك سمك كتير .. اكتر من اللى انا محتاجه كمان . دا اسمه رزق :) ساعتها ممكن يبقى 1+1=3 او 4 او 5 او .....} .

 

وممكن ترمى شبكتك ومتطلعلكش ولا سمكه  ! مع ان في كل الاحوال انت عملت اللى عليك

 1+1=0 ..  .

 

.. بس النتيجه مش متوقفه على وجود التوفيق او الحظ من عدمه .. لو الموضوع كده  مكان حد اتحرك من مكانه , في الحقيقه النتيجه متوقفه عليك انت .. طول ما انت بتتحرك وبتحاول هتلاقى نتيجه .. وحتى نوع النتيجه سلبيه او ايجابيه متوقف عليك .

بس تعمل اللى عليك والتوفيق بتاع ربنا .. يبقى تسيبه لربنا ولو عاوز ربنا يوفقك اطلب منه التوفيق .. لكن متطلبش منه النجاح وانتا قاعد مكانك .